Persoal da Axencia Tributaria concéntrase na Coruña en demanda de melloras salariais e laborais
Traballadoras e traballadores da Axencia Tributaria concentráronse este mércores na Delegación Especial de Galiza (situada na Coruña) para demandar melloras laborais e salariais. A protesta enmárcase no calendario de mobilizacións acordado polas centrais sindicais en resposta ao bloqueo da negociación colectiva para o desenvolvemento da carreira profesional, o novo convenio para o persoal laboral, o teletraballo e un reparto xusto da produtividade.
A protesta celebrouse na véspera da reunión prevista coa directora xeral da Axencia Tributaria na que agardan «que se nos presente unha proposta seria e con dotación económica suficiente que permita desconvocar as mobilizacións». No caso contrario, xa advirten que as mobilizacións continuarán e non descartando a convocatoria de folga en plena campaña da renda.
Henrique García Outeiral , responsábel do subsector da AEAT da CIG denunciou a enorme perda de poder adquisitivo sufrida polo persoal e que nos últimos 6 anos a dirección da AEAT se dedicou a conxelar a negociación colectiva para subir discrecionalmente as retribucións do persoal que máis cobra. De feito, en 2023 a AEAT tiña os 1.265 grupos A1 que cobran os específicos máis altos de toda a Administración Xeral do Estado.
Por iso, unha das principais reivindicacións do colectivo pasa pola negociación e aplicación do acordo de carreira profesional para todo o persoal ao servizo da Axencia. Xunto a isto, que se negocie un novo convenio colectivo do persoal laboral (o actual data do ano 2006 e leva ano e medio denunciado); o desenvolvemento do teletraballo; e revisar os criterios de pago da produtividade, xa que o actual reparto prima ao colectivo de persoal inspector discriminando ao resto do persoal.
«Tamén reclamamos un cambio nas relacións laborais e que a administración deixe de ignorar a representación legal dos traballadores e das traballadoras da AEAT», apuntou García Outeiral.
Oficinas sen persoal
Na protesta, o representante da CIG tamén advertiu que, no caso de Galiza, estanse «deixando morrer» as administracións tributarias de vilas como a de Betanzos, Carballo, Ribeira, Cee ou incluso nas cidades como Ferrol e Santiago, que fican sen persoal «coa cal se presta un mal servizo á cidadanía, que ten que desprazarse e que acaba acudindo ás xestorías para facer os trámites». Para Outeiral este proceso constitúe «unha privatización encuberta dun servizo público que debería prestar a Axencia Tributaria».
En Galiza, a AEAT conta con máis de mil traballadores/as, entre persoal funcionario e laboral, e o Servizo de Vixilancia Aduaneira. Para este colectivo, a CIG demanda tamén melloras das condicións laborais, catalogándoo como profesión de risco e reforzando os medios materiais e humanos.
Relacionado
