Gómez Reino propón ao Ministerio de Defensa o uso de equipamentos militares infrautilizados para acoller refuxiados de Ucraína

O deputado de Galicia en Común e secretario xeral de Podemos Galicia, Antón Gómez Reino, dirixiuse ao Ministerio de Defensa para a posta a disposición no noso país de amplos edificios e infraestruturas de gran capacidade para a acollida de refuxiados que foxen de Ucraína tras a invasión de Rusia.

Gómez Reino fai referencia a equipamentos militares como é o cuartel de Atocha na Coruña, un espazo que actualmente se atopa infrautilizado e que podería servir de exemplo para outros lugares de Galicia e do Estado. “Ante este drama social, debemos facilitar o máximo posible a acollida das persoas desprazadas pola guerra. Temos que garantirlles o acceso ao noso país e un aloxamento adecuado”, sinala.

“O Estado español e a comunidade internacional deben mobilizar todos os recursos humanos e loxísticos para quen está sufrindo a guerra, que nestes momentos son fundamentalmente os cidadáns e as cidadás de Ucraína. Non podemos cesar nin un segundo, temos que deixar todos os nosos esforzos en reforzar as vías diplomáticas. Hai que volver á mesa, negociar un alto ao lume e que sexa o primeiro paso para a reconstrución dun sistema de equilibrio de paz e democracia para o conxunto dos pobos de Europa”, alega Gómez Reino.

“En todos os conflitos humanitarios a responsabilidade que temos todas as democracias e particularmente o Estado español é atender a quen máis sofre, e iso pasa por ofrecer vías seguras para todos os refuxiados e refuxiadas.”