A CIG non asina o preacordo do convenio de hostalaría de Pontevedra porque non acada as reivindicacións exixidas

A CIG non asinou o preacordo de convenio de hostalaría da provincia de Pontevedra atinxido no día de onte entre CCOO, UGT e a patronal porque non se acadan as reivindicacións exixidas e non se avanza en dereitos. A CIG-Servizos critica que se incorpore no texto regulador unha nova figura de contrato, o fixo descontinuo a tempo parcial, que non estaba no actual convenio e que constitúe “un claro retroceso para o persoal traballador da hostalaría”.

Explican que este tipo de contrato afondará na precariedade laboral ao non ofrecer garantía dun período de traballo suficiente, incrementar a parcialidade e a posíbel fraude na contratación.

Xunto a isto, a CIG-Servizos advirte que con este preacordo se exclúe ás camareiras de piso de hoteis de 1 e 2 estrelas da posibilidade de promoción. “Nin entendemos nin compartimos esta decisión, xa que xerará unha discriminación histórica neste colectivo feminizado con respecto a aquelas persoas que realizan as mesmas tarefas pero coa única diferenza de traballar en estabelecementos de 3, 4 e 5 estrelas”, valoran.

No relativo ás cuestións económicas acordouse un 7% de suba salarial para dous anos: 2024 e 2025. Neste senso, a central nacionalista lamenta que hai uns días CCOO anunciou que non asinaría por menos dun incremento do 8%.

Con todo, a  CIG conseguiu que se engadiran cuestións tan importantes como positivas, como que todas as categorías de auxiliares e axudantes teñan a posibilidade de promocionar a un nivel salarial superior, como poden ser o persoal auxiliar de recepción, auxiliar de balneario ou de mantemento, etc.

O texto definitivo aínda se asinará o 2 de setembro, polo que a central sindical insta as persoas traballadoras de tempada que, unha vez publicado o convenio colectivo, reclamen as contías económicas que implica a suba acordada aínda que xa remataran os seus contratos.