A CIG exixe a liberdade do preso político saharauí en folga de fame Naama Asfari

Tras máis de 36 días en folga de fame para denunciar as condicións penitenciarias propias no cárcere marroquí de Kenitra e do resto de persoas presas saharauís, alertouse da delicada situación de saúde e do perigo de morte de Naama Asfari, preso político saharauí. Asfari fora encarcerado de maneira ilegal e condenado a 30 anos de cadea, dos que leva cumpridos 15.

A súa condena produciuse a raíz da coñecida protesta de Gdeim Izik de 2010 –sobre a que cómpre lembrar que a presenza e intervención de ONG e xornalistas estranxeiros fora impedida por Marrocos, e que os únicos datos dispoñíbeis de persoas falecidas, feridas e detidas son os presentados pola autoridade marroquí, segundo referenciou o Observatorio dos Dereitos Humanos (HRW).

Trátase, pois, dun encarceramento arbitrario que vulnera os dereitos humanos e dun xuízo sen garantías, cunha condena baseada en confesións obtidas baixo prácticas de tortura e malos tratos, tal e como reafirmou o Comité das Nacións Unidas contra a tortura.

A folga de fame iniciada por Naama Asfari o 8 de xuño como acto de protesta referido como “A batalla pola dignidade” é un berro de desesperación ante a situación de violencia e tortura aos presos saharauís nos centros penitenciarios marroquís enmarcada na política de ocupación e colonización do Sáhara Occidental por parte do Reino de Marrocos. Mais pretende chamar tamén a atención da solidariedade internacionalista sobre a inacción e inoperancia dos organismos internacionais ante os propios ditames e resolucións que se ditan, cando non sobre o silencio e máxima pasividade como actitudes lexitimadoras da total impunidade da potencia ocupante.

A CIG súmase á campaña internacional “Salvemos a vida de Naama” para exixir:

• A súa inmediata liberación, xunto coa de todas as persoas presas políticas saharauís, en aplicación das resolucións da ONU e, concretamente, do ditame nº 23/2023 do Grupo de Traballo sobre a Detención Arbitraria que declarou ilegais estas detencións e demandou a Marrocos a adopción de medidas de reparación das graves violacións dos dereitos humanos.
• O acceso a unha atención médica urxente e a entrada da súa familia, do Comité Internacional da Cruz Vermella y da Oficina do Alto Comisionado da ONU para os Dereitos Humanos (ACNUDH).
• A intervención da ONU e a visita de urxencia do Relator Especial sobre a Tortura aos centros de detención onde se encontran as persoas presas políticas saharauís.

En coherencia co apoio incondicional á causa pola liberación do Sáhara Occidental  e o compromiso na loita e mobilización por un Sáhara libre e soberano, desde a CIG  reiteramos e sumámonos á exixencia das demandas históricas da Fronte Polisario, da UGTSARIO e do pobo saharauí, tales como a garantía do dereito de autodeterminación e descolonización do Sáhara Occidental, a actuación do Goberno do Estado Español como potencia administradora para garantir a desocupación por parte de Marrocos e dereito ao retorno e o fin do espolio de recursos lexitimado pola Unión Europea.

Alén disto, a CIG manifesta a súa plena solidariedade con Naama Asfari e coas persoas presas políticas saharauís e fai un chamamento a sumarse á campaña “Salvemos a vida de Naama”.

Liberdade para Naama Asfari! Liberdade para as persoas presas políticas saharauís!