En Marea esixe á Xunta de Galicia que acabe co illamento ao que teñen sometido á veciñanza do Courel
O voceiro de En Marea, Luis Villares, e a deputada Paula Vázquez Verao, mantiveron unha xuntanza co persoal sanitario dos centros de saúde de Folgoso do Courel e Seoane do Courel e visitaron a Feira de Pedrafita onde puideron “comprobar a cara e a cruz da realidade na montaña de Lugo” como salientou declarou o voceiro, unha realidade que deixa en evidencia que o medio rural galego ten todo o necesario para crear un medio rural vivo e con valor engadido pero para iso é necesario que a Xunta de Galicia asuma o seu papel. “Feijóo prometeu que esta ía ser a lexislatura do rural e está a ser a lexislatura do despoboamento, do desmantelamento e estrangulamento do medio rural” denunciou Luís Villares.
Nas xuntanzas mantidas en Folgoso, Seoane co persoal sanitiario do centro de saúde o grupo puido comprobar a total desatención e falla de persoal dos centros de primaria, tanto persoal médico como enfermerías. Durante o verán a non substitución do persoal nas vacacións provocou desprazamentos a Monforte e Lugo para realización de servizos básicos como a realización de curas. Comprobouse tamén a carencia de servizos como ambulancia medicalizada está a supor unha grave carencia para á veciñanza.
En Marea defende que non pode existir cidadáns de primeira e de segunda e o dereito a saúde ten que ser garantido con independencia do lugar onde se resida. “A aposta polo rural pasa pola aposta polos servizos e mellora o que implica unha discriminación positiva para o rural algo que non se está a producir” afirmou Villares.
En Marea reitera a petición da retirada da Lei da saúde xa que afonda no desmantelamento do rural, da área sanitaria e da atención primaria e especializada.
Así mesmo, o grupo parlamentario de En Marea presentará unha serie de iniciativas para mellorar as instalacións da Galescola do Courel e esixir á Xunta de Galicia que retomen os servizos de autobús existentes antes do plan de transportes que quedaron reducidos a unha viaxe diaria cando antes tiñan dúas e anularon as viaxes de fin de semana o que provoca o aillamento ainda máis importante da veciñanza.
Relacionado
