Galicia en Común leva ao Congreso a “falta de transparencia” das votacións do Benidorm Fest
A formación preguntará ao Consello de RTVE por unha auditoría do cumprimento das bases do concurso.
Galicia en Común anunciou que este luns rexistrará no Congreso dos Deputados varias preguntas dirixidas ao Consello de RTVE sobre o cumprimento das bases do concurso Benidorm Fest, por mor das queixas e a controversia xerada pola disparidade entre as conclusións do xurado e do voto do público ao longo das semifinais e final para a selección dos representantes de Eurovisión 2022.
A iniciativa parte do deputado Antón Gómez Reino, que incide na necesidade de facer públicos os criterios de valoración para a composición do xurado, a puntuación detallada de cada un deles segundo as regras e tamén os criterios de valoración estipulados nas bases do desenvolvemento do concurso para a puntuación final.
“O Consello de RTVE debe garantir un concurso con total transparencia”, alega Gómez Reino. O deputado contrastou a expectativa e o apoio popular xerado por bandas como Tanxugueiras e Rigoberta Bandini co resultado final declinado polo xurado.
“Cremos que é deber dun organismo público atender ás queixas da poboación que non se sinte representada con esta decisión. O voto popular debe contar de verdade”, sinalou Gómez Reino.
Asimesmo, Galicia en Común preguntará sobre o sistema de votación de mensaxería instantánea, que provocou problemas á hora de enviar as votacións e así se fixeron eco varias usuarias nas redes sociais.
Relacionado
