Redacción •  Galicia •  12/05/2021

As fregonas amarelas volven tomar as rúas da provincia da Coruña

O sector da limpeza de edificios e locais da provincia da Coruña, chamado a dúas xornadas de folga os días 11 e 12 de maio, volve ás rúas para esixir un convenio digno.

As fregonas amarelas volven tomar as rúas da provincia da Coruña

Como novidade respecto aos paros do pasado 22 de abril, desta vez tamén están chamadas á folga as traballadora e traballadores que prestan servizo de limpeza en diferentes institucións públicas, concretamente a Xunta de Galicia, o Parlamento, o Valedor do Pobo e a Universidade de Santiago de Compostela. Isto supón incluír nos paros entre 350 e 400 traballadores e traballadoras máis, que se suman aos case dez mil que xa estaban chamados á folga.

A extensión da folga débese a que nestes centros de traballo, malia contaren con pactos de equiparación, o persoal veríase prexudicado por artigos que pretende recortar a patronal provincial. De feito, se non se achegan posturas, haberá novas convocatorias de folga que, neste caso, incluirán tamén o persoal de limpeza dos hospitais das áreas sanitarias da Coruña, Ferrol e Santiago-Barbanza.

Nas primeiras horas de folga, as fregonas amarelas tomaron as rúas da Coruña, Ferrol e Santiago de Compostela e o colectivo fixo visibles as súas reivindicacións fronte ás sedes patronais e os principais centros comerciais.

Hoxe mércores, no segundo día de folga, CCOO, UGT e CIG convocan unha manifestación para o persoal de toda a provincia. A marcha partirá ás 11 horas da rotonda da Galuresa, en Romero Donallo, e rematará diante da sede da Xunta de Galicia, en San Caetano, «porque o Goberno galego ten moito que dicir neste conflito», sinalan os sindicatos.


CCOO Galicia /  CIG /  Confederación Intersindical Galega /  UGT Galicia /