25 de Xullo: Por unha Galiza ceibe e sen explotación!

Afrontamos este 25 de Xullo nunha crítica situación internacional marcada pola guerra, o crecemento do gasto militar e o xenocidio do pobo palestino. Unha realidade agravada pola ofensiva do capitalismo neoliberal que busca reforzar a explotación de clase e a dominación colonial dos pobos e das nacións.

É por isto que hoxe, máis ca nunca, é necesario o respecto á soberanía económica e política dos pobos e das nacións, porque é inaprazábel a construción dun mundo asentado na xustiza, na solidariedade, na cooperación, na igualdade e na paz.

Galiza é unha nación sen estado, negada dos seus dereitos nacionais. A CIG somos o sindicato maioritario da clase traballadora galega, dunha nación oprimida, co galego como lingua propia en estado de emerxencia crítica. Polo tanto, somos a expresión da capacidade de autorganización do pobo galego como vía para decidir por nós mesmos o noso futuro como clase e como nación.

A nosas reivindicacións dunhas mellores condicións de vida e da necesidade de avanzar na igualdade e no benestar da clase traballadora están directamente relacionadas coa capacidade de poder decidir do pobo galego.

Queremos decidir sobre o noso modelo económico e social para poder aplicar un conxunto de políticas públicas que concentren todos os recursos en favor das maiorías sociais, como único xeito de ter emprego, salarios e ingresos dignos, garantindo unha protección social plena, sen exclusións, consolidando o respecto polos dereitos laborais e a mellora das condicións de traballo.

Soberanía e autogoberno

Necesitamos soberanía e autogoberno real para aproveitar os moitos recursos que temos dispoñíbeis no noso país (produción de enerxía, recursos minerais, riqueza forestal, actividade de produción e transformación no sector agrario e pesqueiro, etc.) e poñelos ao servizo da creación de emprego digno, para completar os ciclos produtivos no propio país, aumentar o valor engadido en sectores básicos da nosa economía e diversificar as nosas capacidades produtivas e industriais, procurando un mellor equilibrio territorial e ambiental, garantindo unha rendibilidade social e non privada e evitando a destrución de emprego e a emigración.

Por iso, hoxe máis ca nunca, reivindicar o dereito a decidir é vital para facerlle fronte xusta e democraticamente a toda esta situación, dispoñendo así dunha alternativa que faga viábel un futuro no que poder vivir e traballar dignamente na nosa Terra e na nosa lingua.

Este 25 de Xullo, Día da Patria Galega, participa e acude a Compostela!