A CIG reclama das autoridades unha actuación contundente e exemplar ante o novo peche patronal de Sargadelos

O dono de Sargadelos está a escribir un novo capítulo no despropósito da súa xestión empresarial ao ordenar outro peche patronal ante unha visita rutinaria da Inspección de Traballo e presentar un expediente de regulación temporal para todo o persoal da fábrica de Cervo, para o que non existe xustificación.

Para o responsábel da CIG da Mariña, Xorxe Caldeiro, estamos “ante un episodio máis na historia que comezou en abril pasado cando Segismundo García decretou un peche patronal inxusto, unilateral e arbitrario e que continúa agora porque no seu momento a autoridade laboral e a propia Xunta de Galiza non se fixeron respectar nin requiriron en firme ao empresario para que cumprira coas súas obrigas legais”.

Se no día de onte o propietario de Sargadelos sorprendía as traballadoras e traballadores de produción botándoos da fábrica de cerámica a causa dunha visita da Inspección, a primeira hora deste venres a sorpresa ía en aumento tras coñecerse que lle comunicara á Consellaría de Emprego o inicio dun despedimento colectivo temporal. Pola solicitude rexistrada, este ERTE afectaría ao conxunto do persoal e tería data de inicio no 27 de novembro de 2025, é dicir, no día de onte, e remate no próximo 15 de decembro, saltándose así toda a normativa que regula estes procedementos.

Os motivos alegados pola empresa refírense á “causas de forza maior”, cando a Inspección de Traballo non adoptou ningunha medida neste sentido nin moito menos ordenou o peche das instalacións por risco grave e inminente. “Non existe ningunha causa que xustifique este ERTE”, asevera Caldeiro, quen augura un escaso percorrido ao expediente de regulación. De feito, horas despois de rexistrar a solicitude, a propia Consellaría emitiu un comunicado rexeitando o expediente por incongruente.

Pero ademais, segundo as publicacións nalgúns medios, García tamén tería presentado hoxe a súa dimisión como CEO de Sargadelos. Aínda que está información non está confirmada, a CIG entende que se trataría dunha medida do empresario para presionar e chantaxear a Xunta e que, de novo, se pregue aos seus intereses.

Mentres o propietario da histórica cerámica galega actúa á marxe da legalidade vixente e cun desprezo absoluto polos dereitos laborais, unha vez máis, os traballadores e traballadoras son as verdadeiras prexudicadas, que ven os seus empregos constantemente ameazados e a súa dignidade laboral asoballada por decisións arbitrarias e inxustas.

Así as cousas, a CIG reclama unha actuación contundente e decidida por parte das autoridades para garantir o dereito ao traballo, que se respecta a normativa laboral e en materia de prevención e saúde, e evitar no futuro novos abusos patronais e peches ilegais que converten en papel mollado toda a lexislación vixente.