Esquerda Unida anima a participar nas mobilizacións en apoio á Flotilla Sumud Global este sábado 30 de agosto

Esquerda Unida chama á cidadanía galega a participar nas mobilizacións convocadas o vindeiro sábado 30 de agosto en varias cidades e vilas do país, en apoio á Flotilla Sumud Global. Esta iniciativa internacional partirá o 31 de agosto cara a Gaza co obxectivo de romper o bloqueo xenocida ao que está sometida a poboación palestina.

“O pobo palestino leva décadas sufrindo a ocupación e a violencia sistemática, e agora estamos a asistir a un xenocidio que, por primeira vez na historia, se comete diante das cámaras, coa complicidade ou coa inacción da chamada comunidade internacional” afirma Lino Costas, coordinador nacional de Esquerda Unida.

Esquerda Unida denuncia que a difusión constante de imaxes e informacións sobre a situación “non se traduce en accións políticas efectivas – sinala Costas. – Estamos a vivir un xenocidio televisado, convertido nun espectáculo máis dentro dunha sociedade adormecida polo capitalismo, e iso degrádanos non só como sociedades, senón tamén como seres humanos”.

A organización subliña que, fronte á indiferenza e ao silencio cómplice dos gobernos, “cobran especial relevancia as iniciativas civís que se desenvolven en distintas partes do mundo para denunciar tanto o xenocidio contra o pobo palestino como a pasividade internacional” matiza o coordinador.

“Desde Esquerda Unida só podemos saudar con orgullo iniciativas como a Flotilla Sumud Global e animar a toda a cidadanía galega a sumarse ás mobilizacións do sábado 30. É unha cuestión de dignidade, de humanidade e de xustiza”, conclúe Lino Costas.