Esquerda Unida súmase ás protestas pola nefasta xestión da Xunta nos lumes
- A organización participou onte nas mobilizacións contra a xestión dos lumes por parte da Xunta de Galicia e pola mellora das condicións do persoal do servizo de extinción que se levaron a cabo en máis de 20 vilas galegas.
Esquerda Unida manifesta a súa preocupación polo alarmante incremento dos incendios forestais que asolan á comunidade, especialmente a provincia de Ourense, que continúa arder, con focos activos ou o que estamos a ver hoxe na zona de Oia e de Vilaboa.
“Trátase dunha verdadeira catástrofe ambiental e social, a destrución causada polos lumes é dunha gravidade extrema” afirma Lino Costas, coordinador Nacional de Esquerda Unida.
“Non podemos aceptar que cada ano se repita o guión do desastre, que a Xunta so reaccione cando o lume xa está activo, en lugar de adoptar un modelo de xestión forestal continua e preventiva” sinala Lino Costas. A perda de ruralidade, o abandono do agro, a ausencia de pastoreo e a proliferación de monocultivos inflamables potencian o risco de incendios extremos.
“Mais a política forestal galega continúa orientada a intereses produtivistas, favorecendo o eucalipto e o piñeiro fronte ás especies autóctonas, cunha visión de curto prazo e sen planificación integral – engade –. Seguen sen pular pola multifuncionalidade do monte ou pola prevención real, convertendo cada verán nunha emerxencia permanente”.
Esquerda Unida quere incidir na denuncia da situación laboral de precariedade das brigadas de extinción. “Tal e como veñen denunciando as organizacións sindicais, a situación é insostible: máis de 200 vacantes sen cubrir no servizo de extinción, contratos temporais, falta de medios de protección e unha xestión caótica do operativo» lembra o coordinador nacional.
No día de onte, Esquerda Unida participou nas mobilizacións que se deron no conxunto do país, nas que centos de persoas saíron ás rúas para denunciar a nefasta xestión da Xunta e reclamar un cambio profundo na política forestal e na organización do operativo contra o lume.
“A grave situación actual en Galicia, tras décadas de abandono do rural, crise climática e colapso operativo, non pode resolverse sen apoio social, políticas activas e investimento de recursos públicos – suliña Lino Costas -. É preciso reforzar o rural, protexer ás persoas, preservar o monte e actuar agora para evitar que sexa tarde”.
Relacionado
