As traballadoras de UNVI mantéñense en loita
As traballadoras de UNVI, S.A., empresa fabricante de autobuses situada en Ourense, levan meses mobilizándose en defensa dun convenio digno e dun calendario laboral negociado, fronte ó desprezo e o bloqueo intencionado da empresa.
Dende novembro, tras a constitución da mesa de negociación do convenio colectivo, o comité presentou unha proposta de convenio con vontade de diálogo. A resposta da dirección foi silencio, bloqueo e desprezo, sen amosar interese real por mellorar as condicións laborais do cadro de persoal.
Durante semanas, a patronal mantivo silencio, sen achegar proposta algunha, prolongando deliberadamente unha situación inaceptable. Esta situación de bloqueo sumouse a un intento unilateral por parte da empresa de recortar dereitos históricos, atacando o calendario laboral e pretendendo eliminar as catro semanas de vacacións en agosto para adaptalo exclusivamente ás súas necesidades produtivas.
A resposta foi unitaria e contundente: as traballadoras dixeron basta ó bloqueo e á falta de respecto permanente. Suspendéronse horas extra, sumáronse ás mobilizacións do metal e iniciouse un ciclo de folgas cun seguimento próximo ó 100%, paralizando a produción e enchendo as rúas de Ourense cunha mensaxe clara: “Se non hai negociación, hai mobilización.”
Grazas á loita colectiva, a empresa viuse obrigada a retirar o ataque ó calendario de vacacións e a presentar, por fin, unha proposta de convenio. Con todo, a plataforma proposta afástase das reivindicacións iniciais, mantendo a falta de respecto á clase traballadora. Presentaron un convenio centrado en normas, control e sancións, con medidas restritivas e cunha distribución irregular da xornada que pretende converter o persoal nun cadro “á carta”, con semanas interminables de ata 10 horas diarias.
Cada intento de presión reafirma a convicción dun cadro de persoal organizado, consciente e decidido a non retroceder nin un paso en dereitos: as mobilizacións continúan.
Este xoves 8 de xaneiro, ás 19:30, nova manifestación dende a casa sindical, no parque de San Lázaro. As traballadoras anuncian máis folgas os próximos 15, 21, 22, 28 e 29 de xaneiro, mentres a empresa non respecte ás traballadoras e non poña enriba da mesa un convenio con melloras reais, xustas e palpables.
Non máis dilacións. Non máis desprezos. A forza está nas traballadoras.
Seguimos loitando ata acadar o convenio digno que merecemos.
Relacionado
