O paro cebouse, o pasado mes de xullo, en Galiza coas mulleres de entre 30 e 44 anos do sector Servizos

O mes de xullo rematou cun total de 107.858 persoas desempregadas, 604 máis que no mes anterior. O paro incrementouse en todas as provincias, sobre todo na Coruña, e nos sectores de Servizos, con 860 persoas (+1,1%) e Industria, con 49 persoas desempregadas máis (+0,5%). Dáse ademais a preocupante circunstancia de que o desemprego baixou entre os homes e subiu entre as mulleres de entre 30 e 44 anos, aumentando así a fenda xa existente.

Atendendo a estes datos, o secretario confederal de Emprego, Francisco González Sío, considera que se confirma a dependencia da economía galega de sectores precarios, consolidando un modelo laboral inxusto, estacional e discriminatorio. “É moi preocupante, xa que non hai unha recuperación da actividade industrial. Seguimos baseando absolutamente todo o emprego na hostalería e no comercio”.

De feito, González Sío apunta que unha de cada catro persoas está afiliada no sector do comercio e denuncia que a prevalencia deste sector, xunto co da hostalería “fai que esteamos nesa senda de empobrecemento, de cronificación do desemprego estacional e estrutural”.

Para o representante da CIG “o sistema económico é incapaz de acabar co desemprego porque o que oferta non cumpre as expectativas dunha clase traballadora que está sobrecualificada para un mercado que exixe precariedade e pobreza laboral”. Unha precariedade en aumento desde 2021 que, asegura, “vén acompañada de peores condicións laborais e un empobrecemento nos salarios”.

Nese sentido, afirma que “se queremos ter un futuro estable e unha mellora real, non se pode manter unha economía exclusivamente en actividades ligadas ao turismo. Ten que ter unha base sólida a nivel produtivo e industrial”.

Aumenta a temporalidade

González Sío chama atención sobre o incremento da temporalidade -xa que dos 86.000 contratos rexistrados, 62.000 foron temporais- e sobre o número de contratos por circunstancias da produción, que chegaron no mes de xullo aos 48.500. “Son datos récord de contratación por circunstancias da produción. Isto leva a pensar que unha parte moi importante das persoas traballadoras seguen sufrindo o que había antes da reforma laboral: contratos de semanas, meses ou mesmo días. Estamos falando de récord respecto dos meses anteriores á reforma laboral”.

A este respecto considera que a reforma laboral ten dúas variantes. Por unha banda, que non conseguiu rematar coa temporalidade e, pola outra, que agora é moito máis barato despedir as persoas con contratos indefinidos, polo que “ter un contrato indefinido non é garante de estabilidade, porque moitas persoas contratadas con esta modalidade son despedidas pouco tempo despois, porque a indemnización é moi baixa e non ten practicamente ningún custo para as empresas”.

Incremento do paro entre as mulleres

O secretario confederal de Emprego chama a atención sobre o incremento do desemprego entre as mulleres, no sector servizos e nas persoas de máis de 44 anos. “Isto implica que no momento en que a hostalería e o sector servizos non son capaces de demandar máis emprego do que poden, este colectivo de mulleres non ten acceso a ningún outro sector”. Responsabiliza desta situación a un modelo laboral que “castiga principalmente ás mulleres”.

Por iso, González Sío, aposta por políticas activas de emprego dirixidas a estes colectivos que teñen máis dificultade para encontrar traballo e que moitas veces teñen que aceptar condicións moi precarias. “Os sectores desfanse das persoas maiores e, despois, é case imposible que volvan traballar neses sectores. Tampouco hai políticas activas para darlles outra formación e outras capacitacións a esas persoas para que outros sectores as poidan incorporar, porque, evidentemente, ir con esa idade á hostalería e ao comercio é moi complicado. E, se son os únicos sectores que ofrecen capacidade de traballar, é moi difícil que estas persoas atopen emprego”.