A Xunta financia a rede caciquil do PP na emigración no canto de promover un plan anticrise e políticas activas de emprego

A CIG denuncia que a Xunta de Galiza aproveitou a recente viaxe a Suíza do presidente, Alfonso Rueda, para financiar a rede caciquil do Partido Popular na emigración a través de fondos que deberan ir destinados a promover un plan de choque para paliar os efectos da guerra e políticas activas de emprego ante o alarmante medre do paro no noso país. A Consellaría de Emprego sufragou con 120.000 euros un acto lúdico organizado por unha asociación presidida polo principal fornecedor de votos da diáspora, segundo recolleu un medio de comunicación e puido comprobar a oposición política.

Dende a Secretaría Confederal de Emprego da CIG lamentan que o Goberno galego estea máis preocupado por garantir que os milleiros de sufraxios da emigración sexan para o PP nas próximas eleccións que por aplicar políticas activas de emprego e por exercer as súas competencias deseñando un plan de choque propio con medidas urxentes para facerlle fronte ás consecuencias económicas e sociais da guerra imperialista.

Sobre todo nun contexto de especial gravidade para a clase traballadora tendo en conta a actual carestía da vida e as dificultades de acceso á vivenda, e cunha taxa de paro que en Galiza medra o dobre que no conxunto do Estado, confirmando unha vez máis a debilidade dun mercado laboral caracterizado pola precariedade e a inestabilidade. “Mais a Xunta permanece allea a esta realidade e insiste na súa estratexia propagandística, con milleiros de cartos públicos para os medios de comunicación afíns en territorio galego e con multitudinarios actos de compra de vontades alén das nosas fronteiras”, tal e como sinala Paco Sío.

Para o secretario confederal de Emprego é evidente que as prioridades da Xunta non pasan pola creación de postos de traballo -como tamén demostra o feito de que siga a ignorar as propostas da CIG nesta materia- nin por cambiar o modelo produtivo baseado no sector servizos e dotar o país dun plan industrial propio que garanta emprego de calidade. “Mentres a xente moza ten que emigrar por non ter traballo en condicións dignas, o Goberno do PP e en especial o conselleiro de Emprego botan man de cartos públicos para gañarse o favor desas mesmas persoas expulsadas de Galiza pola súa incompetencia”, censura Sío.